Gian Ngail (19/01/2006)

Sejak isteri dan anak anak saya pulang dari Pontianak pada bulan September sampai ani, aku inda lagi turun turun kekampong untuk mengail samada menggunakan perahu atau mengail dijambatan penungguan tambang. Maklum tah manjaga anak tiga orang. Sejak atu jua banyak cerita cerita yang ku dangar tentang orang kampong dapat lauk yang banyak dan kawanku sama memancing jua belurih lauk besar besar dan tagap tagap tarikannya. Apalagi kawan sepejabat lapas membeli perahu pvc tangahku belurih lauk jua, ia tah gatal hati bertambah gian kan turun mengail tapi apakan daya belum dapat izin lagi dari bini.

Yang pertama ku dengar dari sepupuku, siHarun yang siMaidi orang kampong (abang siLani kawan ku sama sama memancing) belurih Kalakitok hampir setiap hari 4 – 5 kilo sampai kehabisan umpan. Macam biasa ia turun memancing ganya di ulu sungai Brunei. Disana banyak pulang tampat tampat mangail macam diSungai Batu, Luba, Jung Batu dan lain lain tempat yang berhampiran disana. Ia jarang sekali turun kelaut bukan apa, ia inda tahan dengan pukulan ombak atau alun yang membuat perahu balinggang yang bolih menyebabkan ia mauk laut. Memang diulu Sungai Brunei terkenal dengan lauk lauk macam ani, apatah lagi sudah lama inda dikaili ataupun sudah lama hujan inda turun diulu sana. Ani yang menyebabkan lauk lauk membesar dan berkeliaran mencari mangsa.

Yang kedua sepupuku datang kepejabat minta buatkan sauh biasa saja untuk perahunya kerana inda tahan mendengar cerita dari orang kampong hatinya pun terasa gatal dan gian kan turun keulu sungai. Dalam satu jam lebih saja siap tia sauh untuk diturunkan. Ia bercerita yang siLani belurih Ungah yang tagap dan besar besar saiznya. Sampai tangannya yang memiggang tangsi bersaiz 45lb membuat tangannya berlipat dan kacup oleh tarikan lauk tagap sampai indakan sanggup menahan kesakitan tapi dilawannya dan digagahi jua agar lauk inda melarikan tangsinya kebatu sampai akhirnya tali tangsi putus melatup bunyinya ngam ngam arah tangannya. Ia terduduk menahan kesakitan dan kengalihan bermain dengan lauk tadi.

Yang ketiga perahu pvc tangahku yang dibeli Pg Harris sudah pun dicoba dipenurunan perahu diMuara terbukti perahu atu memang membawa tuah atau ‘hang’nya bila durang belurih bermacam macam lauk naik dari lauk Langisi, Kurisi – Kurisi, Kalakitok dan lain lain lagi. Pg turun sama cigu Said yang menjadi partnernya kelaut sampai sekarang dan sejak atu jua durang inda pernah membawa balik dengan tangan kosong sampai menjadi perambaan durang “Pasar lauk nda lagi tatulus” sama “nda tau dimana jalan kepasar Gadong”. Selama ani lauk lauk yang sudah durang belurih saperti lauk Langisi, Kalakitok, Kurisi – Kurisi, Umpak, Lapih, Ungah dan terakhir ani katanya belurih Sembilang seberat 1.5 kg dan sekecilnya 0.5 kilo dalam 6 ekong.

Tambah gatalnya hati ani bila sudah mendengar cerita durang atu, belum lagi mendengar cerita siJahri dan kawannya belurih Belanak diUjung Pelumpong pakai pukat jarang. Gian.. gian.. gian.. hati ani kan turun kelaut mengail.

Pada hari minggu kamarin (19/02/06) Cigu Said bercerita pasal durang mengail inda naik naik lauk yang makan kailnya tiga kali – dua kali putus dengan perambut 25 paun dan sekali jangkang kailnya. Tapi ditali tangsinya merakat sejenis leher balandir badukang, utik ataupun pari. Kalau badukang, utik ataupun jahan walau besar macamana pasti akan dapat kita naikkan. Jadi menurut perkiraan yang meranjatkan kail Cigu Said atu bolih jadi lauk pari. Antara lauk yang durang naikkan – lauk anduping yang dinaikan olih cigu Said dengan umpan mati secara beranggung dan lauk kalakitok dalam pabalasan ekongnya menggunakan umpan hidup yang dinaikkan olih Pg Harris dan inda ketinggalan lauk langisi dalam beberapa ekong saja.

Lauk langisi bolih kita naikkan asalkan batu kailnya agak barat sikit kerana kalau batu kailnya ringan umpan yang dibuang akan lambat tanggalam dan ani akan memudahkan lauk diatas air akan manyambar saperti lauk kalakitok, languran, berusak (banau), titir ataupun pisang pisang. Tapi inda jadi masalah kalau lauk lauk ani memakan umpan kerana ia dikira antara lauk yang baik baik jua. Kecuali bagi orang yang inda pandai makan saja.

Minggu lapas sama jua kata cigu Said ada tiga kali kailnya putus diranjatkan lauk lauk tagap. Sekali menggunakan perambut sadapa bebatukan sandakau. Tapi kedalaman air ditampat atu ganya dalam sadapa labih kedua dapa saja. Baru saja kan malabuhkan kail yang satu, udah tia kana ranjatkan apalagi, tarik punya tarik sampai kesandakau nampak udah elak badannya memutih tapi alum sampai siut turun, tangsi perambut putus dan bye bye.

Sekali lagi dibawah simen, nda jua batah menurunkan kail udah tia kana ranjatkan dan baru kan menarik dilarikannya ketiang dan putus lagi dan bye bye.

Sekali lagi kail Cigu Said kana ranjatkan kali ani sampat bemain udah dan apa bolih buat kan nasib kali lauknya bewarna merah melompat ketepi ujung perahu dan kail pun putus lagi.

Durang ganya dapat menaikkan beberapa ekong lauk – sambilang, kalakitok dan langisi.

Ituari ada cigu Shaari cerita pasal ia belurih lauk barahan barat 4 kilo 2 ekong tangahari pulang makannya tu. Biasanya barahan ani makan sabalah malam ari. Ia turun tampat kami ngail dulu arah (mungkin) kapal pacah sababnya dalam ‘Prono fishfinder’nya atu nampak macam bakas tiang kapal jangul jangul. Disini (Majawa) lauknya yang tagap tagap atu inda pandai banaik olihnya walaupun makai tangsi 80 paun. Puas jua udah kuliat cigu Shari bamain sampai pakai penyarung jari gatah dua buting pun inda talawan olihnya sampai putus ditangah, mungkin dibawanya katiang basi atu kali. Jangan kan atu, mula mula ia maranjatkan kail sudah nampak tagapnya, mun karikan kayu atu tarabang tapalanting dari turusnya sampai bapusing kuat macam gasing dalam parau. Aku sandiri inda sanggup kan mamiggang disuruhnya.

Ia mula mula mengulur tangsi 80 paun umpan kambura hidup alum lama kana ranjatkan tainya, sampat bamain sakajap tapi putus. Difikirnya lauk iyu, jadi diturunkannya parambut dawai panjang 2 dapa kali, alum lama kana ranjatkan lagi atupun balawan bamain jua olihnya, disediakannya talampung untuk dikaitkannya, maksudnya kan dianyutkannya dulu supaya lauk iyu ani lamah baru ia manaikkan nanti. Tapi sabalum atu dimainnya dulu kan marasa macamana tagapnya tapi dapat dilawannya dan sekali diliatnya lauk barahan barat 4 kilo. Diulurnya lagi dapat lagi lauk barahan tapi lapas atu inda tia lagi makan. Sanang jua sudah hati tu dapat 2 ekong lauk barahan sabarat 4 kilo. Kan dikira lapas jua minyak kalau parambaan orang kampong!


(5hb.Mac 2006)
Minggu lapas awal subuh durang bis pg sama cg Said turun lagi bebakal udang $10.00. Saperti biasa durang tarus saja manuju kaPancang Rabah nda lagi kan singgah dibawah plabuhan. Sampai jadi parambaan durang “dijaling palabuhan”.

Sebaik saja durang balabuh sauh, tarus turun jaul cg Said samantara cg pg menurunkan jaul agak tabal sikit tujuannya kan mengerjakan lauk ungah yang selalu maranjatkan dan putus pasal mamakai tangsi lapis ari atu iatah dipakainya 40lb pohon 30 parambut (40/30) dan satu lagi 30lb pohon 20lb parambut (30/20). Cg Said sudah menaikkan 3 ekong umpak sampai cg pg tajaling jaling kan jaulnya nda kana gamit. Nda tahan hatinya digulung yang 40/30 dan diganti sama yang lapis 15/15 (nda sama jenis antara pohon dan parambut yang dipakainya). Tarus dibaginya baumpan dah atu ditalangkannya agak jauh sikit dari perahunya. Nda sampai saminit panamai cg pg tarus tia kana ranjatkan. Bamain jua cg pg dibuatnya ada dalam 5 – 10 minit bukan apa tangsi ganya 15/15 jadi tapaksa tah bamain, takut putus. Sudah kan ampir perahu baru tia melompat, manampakkan dirinya rupanya salungsung. Tarus cg Said ngambil siut dan atupun nda muat bah siut ah. Sudah naik diperahu,baik jua pamata atu arah bibirnya, mun nda rubit jua tu. Palak palak mata karang lagi..... Cg Said menaikkan anduping pakai ranggung dua.

Udang tinggal lapan ekong lagi durang tarus pindah arah simin. Disana air naik pasang, baru saja cg pg malabuhkan jaulnya tarus tia kana ranjatkan kalakitok. Tarik punya tarik rupanya yang mengikutkan kalakitok yang dapat ani pajal mengerumuni sampai kuning warna air olihnya. Tapi sayang umpan durang ganya ampat ekong saja lagi, jadi tarpaksa tah saekong udang dibagi ampat potong; atupun naik samua dari potongan potongan umpan udang ah. Sampai basalok udang dalam mulut karapu olih durang ah.... Nda tah karang pajal tu, pajal kali ah! Yang durang dapat ari atu 20 ekong kalakitok, 2 ekong langisi, 3 ekong umpak, 8 ekong anduping dan karapu. Bapesta banar banar durang ari atu tariak tariak macam Red Indian sampai tacangang orang orang yang ngail dibatu ah................